Mother’s Day

رات پھر خواب میں آکر مجھ سے

میری امَی نے کچھ سوال کئے

اُس سے پہلے مجھے دعا یہ دی

خدا کرے کہ تو سو سال جئے

اُن کی آنکھوں میں محبت بھی تھی

اور افسوس بھی تھا

ایک آنسو تھا اُن کی آنکھوں میں

جو چِلَاتا بھی تھا خاموش بھی تھا

مجھ سے پوچھا کہ بیٹے کیسے ہو

کوئی دقَت تو نہیں ہے تم کو

پھر کہا

تم کو معلوم ہے کیا؟

میں بڑی تکلیف میں ہوں

جب سے لیٹی ہوں سو نہیں پائی

تمہاری وجہ سے میں کُھل کے رو نہیں پائی

تیرے گناہ مجھے سانپ بن کے ڈ ستے ہیں

فرشتے آکر ہر روز فقرے کستے ہیں

تمہی بتاؤ بیٹا میں نے کیا کمی کی تھی

میں نے سمجھانے میں بیٹا کوئی کمی کی تھی

یا میری تربیت ادھوری تھی

کیوں بُرے کام روز کرتے ہو

کیوں نہیں اُس خدا سے ڈرتے ہو

جس نے تم کو یہ جان بخشی ہے

جس نے تم کو امان بخشی ہے

لوٹ کر جس کے پاس جانا ہے

کیا اسے منہ نہیں دِکھانا ہے

کیا تمہیں اس لئے پڑھایا تھا

کیاتمہیں سب یہی سکھایا تھا

کہ اپنے علم پر غرور کرو

اور اپنے نفس کو مسرور کرو

جب بھی بولو تو بس غلط بولو

ظلم دیکھو تو لب نہیں کھولو

چھوڑ کر دین بھول کر مذہب

اپنی اوقات نوٹ میں تولو

سچ بتاؤ کہ کیا یہ قصَہ ہے

کیا یہ انداز میری تربیَت کا حصَہ ہے

مجھکو افسوس نہیں جو مجھے تو بھول گیا

رنج یہ ہے کہ میرا جینا ہی فضول گیا

میں تو جی کے بھی روز مرتی ہوں

میں تجھے روز یاد کرتی ہوں

جس طرح جینے کا آغاز کیا ہے تو نے

اُسکے انجام سے میں ڈرتی ہوں

خدا کرے کہ تجھے اب بھی سمجھ آجائے

کوئی تو آ کے تجھے سیدھی راہ دکھا جائے

کہ اختتام ہو تیری گناہ کی شاموں کا

مجھے بھی اجر ملے تیرے نیک کاموں کا